Монгол Улсын Засгийн газрын хэрэгжүүлэгч агентлаг Улсын бүртгэлийн ерөнхий газрын дарга Б.Баасандорж, Бүгд Найрамдах Солонгос Улсын Шүүхийн харьяа Төрийн албан хаагчдын сургалтын төвийн захирал Им Юнг Му нар өнөөдөр /2019.09.17/ БНСУ-ын Гүяанг хотноо хоёр байгууллагын хамтын ажиллагааг өргөжүүлэх зорилгоор Санамж бичигт гарын үсэг зурлаа.
Улсын бүртгэлийн ерөнхий газар болон БНСУ-ын Шүүхийн харьяа Төрийн албан хаагчдын сургалтын төвийн удирдлагууд Санамж бичигт гарын үсэг зурж баталгаажуулснаар Монгол Улсын улсын бүртгэлийн байгууллагын албан хаагчдын мэргэжлийн ур чадварыг дээшлүүлэх чиглэлээр сургалт зохион байгуулах, боловсон хүчин солилцох, мөн хоёр улсын бүртгэлийн байгууллагын системд ашиглагдаж буй технологид туршлага солилцох боломж нээгдэж байгаа юм.
БНСУ-ын Шүүхийн харьяа төрийн албан хаагдын сургалтын төв нь 1979 онд байгуулагдаж байсан ба эдүгээ нийт 90 гаруй ажилтан, албан хаагчидтай. Тус төв нь шүүхийн байгууллагын албан хаагчдын сургалт /шүүгчээс бусад/, хэрэгжүүлэгч байгууллагын сургалт, Дээд шүүхийн даргын зайлшгүй шаардлагатай гэж дэмжсэн сургалт зохион байгуулахаас гадна Үндсэн хуулийн цэц, Батлан хамгаалах яам, Хууль зүйн тусламжийн корпораци, иргэний эрүүл мэндийн даатгалын корпорацийн захиалгат сургалт тус тус зохион байгуулдаг аж.
2018 онд нийт 134 удаагийн 64 төрлийн сургалтанд 5,304 хүн хамргадсан бол 2019 онд 137 удаагийн 68 төрлийн сургалтанд 8,067 хүн суралцах төлөвтэй байна.
Маргаашийн арга хэмжээ БНСУ-ын үл хөдлөх хөрөнгийн бүртгэл, хуулийн этгээдийн бүртгэл, иргэний бүртгэл сэдвийн дор сургалтаар үргэлжилнэ. Энэхүү сургалт Азийн хөгжлийн банкны техникийн туслалцааны дэмжлэгтэйгээр хэрэгжиж байгаа “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох төсөл”-ийн санхүүжүүлэлтээр хэрэгжиж буйгаа онцлог хэмээн Гүяанг хотоос мэдээлэв.
