Улсын бүртгэлийн ерөнхий газрын дарга Б.Баасандорж өнөөдөр /2019.10.07/ Бүгд Найрамдах Солонгос Улсын Олон улсын хамтын ажиллагааны байгууллага буюу КОЙКА-гийн Монгол Улс дахь суурин төлөөлөгчийн газрын орлогч дарга хатагтай Ким Сү Янгь тэргүүтэй төлөөлөгчдийг хүлээн авч уулзлаа.
Уулзалтын эхэнд УБЕГ-ын дарга Б.Баасандорж өнгөрсөн наймдугаар сарын 13-нд хатагтай Ким Сү Янгьтай уулзаж, “Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх төсөл” ирэх 2020 оноос БНСУ-ын КОЙКА-гийн буцалтгүй тусламжийн хөрөнгөөр санхүүжиж хэрэгжүүлэхээр болсон талаар санал солилцож байсныг дурдаж, энэхүү хамтын ажиллагаа ажил хэрэг болж өнөөдөр КОЙКА-гийн судалгааны баг Улсын бүртгэлийн байгуулагын үйл ажиллагаатай танилцахаар хүрэлцэн ирсэнд талархал илэрхийлэв. Тэрбээр уулзалтын үеэр, уг төслийг хэрэгжүүлэхэд төлөвлөгөө боловсруулах үүрэг бүхий судалгааны багтай уулзаж буйтай баяртай байна гээд энэхүү төслийг амжилттай хэрэгжүүлснээр Улсын бүртгэлийн байгууллагын аймаг, нийслэл, сум, хорооны бүртгэлийн нэгжийг орчин үеийн техник, тоног төхөөрөмжөөр хангаад зогсохгүй Монгол Улсын 3,2 сая иргэн, 185 мянга гаруй аж ахуйн нэгж үр шимийг нь хүртэх болно хэмээн онцолж байв.
Төлөөлөгчдийн бүрэлдэхүүнд КОЙКА-гийн судалгааны багийн ахлагч,ICT хариуцсан мэргэжилтэн Юн Гвон, тоног төхөөрөмж хариуцсан мэргэжилтэн Жи Мён Жүн, гүйцэтгэлийн үнэлгээний мэргэжилтэн Ким Хан Гёль, төслийн менежер Б.Энхсаруул нар багтсан ба Улсын бүртгэлийн байгууллагын нийслэл болон Төв аймгийн бүртгэлийн хэлтсийн үйл ажиллагаатай танилцаж, төсөл хэрэгжүүлэхэд юуг анхаарах, судалгаа хийх зэрэг газар дээр нь ажиллахаар хүрэлцэн ирээд байна.
Уулзалтын үеэр УБЕГ-ын Мэдээллийн технологийн газрын даргаД.Ган-Эрдэнэ Улсын бүртгэлийн байгууллагын үйл ажиллагаа, нөхцөл байдал, тулгамдаж буй асуудал болон уг төсөл хэрэгжүүлснээр хүрэх үр дүнгийн талаар мэдээлэл хийв. Мэдээлэлтэй холбогдуулан судалгааны багийн гишүүд сонирхсон асуултдаа хариулт авч, нийслэл болон орон нутагт ажиллах үеэр дэлгэрэнгүй мэдээлэл авахаар болов.
Түүнчлэн, уулзалтад Хууль зүй, дотоод хэргийн яамны Олон улсын гэрээ, гадаад хамтын ажиллагааны газрын дарга Т.Бат-Өлзий оролцож, төлөөлөгчидтэй санал солилцсон юм. Тэрбээр, Бүгд Найрамдах Солонгос Улсын Олон улсын хамтын ажиллагааны байгууллага нь Монгол Улстай хамтран ажиллаж ирсэнд талархал илэрхийлэхийн сацуу Хууль зүй, дотоод хэргийн яамны зүгээс уг төслийг хэрэгжүүлэхэд бүхий л туслалцаа, дэмжлэг үзүүлэхэд бэлэн буйгаа илэрхийлж, судалгааны баг газар дээр нь ажиллахад юун дээр анхаарах зэрэг асуудлууд тодорхой болно гэдэгт итгэлтэй байна гэв.
Ийнхүү талууд төсөлтэй холбогдуулан мэдээлэл, санал солилцсноор өнөөдрийн уулзалт өндөрлөсөн юм. Уулзалтад Улсын бүртгэлийн байгууллагыг төлөөлж УБЕГ-ын Тамгын газрын дарга Г.Цолмон, Санхүү төлөвлөлтийн газрын дарга С.Тэрбиш, Мэдээллийн технологийн газрын дарга Д.Ган-Эрдэнэ, Мэдээллийн технологийн газрын Мэдээллийн сан, программ хангамжийн хэлтсийн дарга П.Нэргүй, тус газрын Мэдээллийн сүлжээ, техник ашиглалтын хэлтсийн дарга С.Чинбат, Мэдээллийн сүлжээ, техник ашиглалтын хэлтсийн ахлах мэргэжилтэн Б.Чойжилсүрэн болон бусад албаны хүмүүс оролцов. Төлөөлөгчид маргааш Төв аймгийн Зуунмод, Эрдэнэ сумдад ажиллана.
