УБЕГ-ын Хуулийн этгээдийн улсын бүртгэлийн газраас орон нутаг дахь хуулийн этгээдийн улсын бүртгэгч нарт хуулийн этгээдийн эцсийн өмчлөгчийг тогтооход анхаарах асуудал, мэдээллийг улсын бүртгэлд бүртгэхэд нэгдсэн ойлголт өгөх, мөн хууль эрх зүйн мэдлэгийг нэмэгдүүлэх зорилгоор өнөөдөр /2020.08.22/ сургалт зохион байгууллаа.
Сургалт танхим болон цахимаар зохион байгуулагдаж, Монголбанкны Санхүүгийн мэдээллийн албаны Бодлого хэрэгжилт, хамтын ажиллагааны хэлтсийн захирал Л.Очгэрэл, Үйл ажиллагааны хэлтсийн лавлагааны шинжээч Г.Буян-Өлзий нар дэлгэрэнгүй мэдээлэл хүргэв.
Уг сургалтад УБЕГ-ын Тамгын газар, Хуулийн этгээдийн улсын бүртгэлийн газар, Нийслэлийн Баянзүрх, Хан-Уул, Чингэлтэй дүүрэг дэх Улсын бүртгэлийн хэлтсийн Хуулийн этгээдийн улсын бүртгэгч нар танхимаар хамрагдсан бол Нийслэлийн Багануур дүүрэг дэх Улсын бүртгэлийн хэлтсийн хуулийн этгээдийн улсын бүртгэгч болон 21 аймаг дахь Улсын бүртгэлийн хэлтсийн хуулийн этгээдийн улсын бүртгэгч нар цахимаар холбогдон оролцлоо.
Татварын ерөнхий хуулийг дагаж мөрдөх журмын тухай хуулийн 9-р зүйлд “Хуулийн этгээдийн улсын бүртгэлийн тухай хуульд өөрчлөлт оруулах тухай хуулийг 2019 оны гуравдугаар сарын 22-ны өдөр баталсантай холбогдуулан 2020 оны нэгдүгээр сарын 1-ний өдрөөс өмнө хуулийн этгээдийн улсын бүртгэлд бүртгүүлсэн этгээд нь тухайн хуулийн этгээдийн эцсийн өмчлөгчийн мэдээллийг 2021 оны нэгдүгээр сарын 1-ний өдөр багтаан хуулийн этгээдийн улсын бүртгэлд бүртгүүлнэ” гэж заасны дагуу Хуулийн этгээдийн улсын бүртгэлийн газраас холбогдох ажлуудыг үе шаттайгаар зохион байгуулж байгаагийн нэг нь өнөөдрийн сургалт юм.
Хуулийн этгээдийн шууд болон шууд бус эцсийн өмчлөгчийг бүртгэх нь авлига, хээл хахуулиас ангид байх, татвараас зайлс хийх, мөнгө угаах, терроризмыг санхүүжүүлэх гэмт хэргээс урьдчилан сэргийлэхэд чухал ач холбогдолтой гэдгийг Хуулийн этгээдийн улсын бүртгэлийн газрын дарга Ж.Аюуш сургалтын үеэр онцолж байв.
Тэрбээр, хуулийн этгээдийн эцсийн өмчлөгч /шууд бус/-ийн мэдээлэлд өөрчлөлт орсон тухай бүрт хуулийн этгээдийн улсын бүртгэлд үнэн зөвөөр дахин бүртгүүлэх шаардлагатай байдгийг анхаарууллаа.
