Азийн хөгжлийн банкнаас “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох” төслийг Улсын бүртгэлийн ерөнхий газарт 2018 оноос үе шаттайгаар хэрэгжүүлж байна. Тэгвэл уг төслийн хэрэгжилтийн өнөөгийн байдал болон цаашдын хамтын ажиллагааны талаар санал солилцохоор УБЕГ-ын дарга Д.Дэлгэрсайхан Азийн хөгжлийн банкны Монгол дахь Дэд захирал бөгөөд Суурин төлөөлөгчийн орлогч, төслийн удирдагч Деклан Магий тэргүүтэй төлөөгчдийг өнөөдөр /2020.11.10/ хүлээн авч уулзлаа.
Азийн хөгжлийн банкны Монгол дахь Дэд захирал Деклан Магий уулзалтын эхэнд төслийн хүрээнд хийгдсэн ажлуудыг танилцуулж, Азийн хөгжлийн банкнаас хэрэгжүүлж буй төсөлд Улсын бүртгэлийн байгууллага бүхий л талаар идэвхтэй оролцож, хэрэгжилтийг ханган ажиллаж буйд сэтгэл өндөр байгаагаа илэрхийлэв. Тэрбээр, өнөөдрийн байдлаар уг төсөл 80 гаруй хувьтай хэрэгжиж, томоохон ажлын нэг болох улсын бүртгэлийн нэгдсэн сүлжээнд холбох ажил 2020 оны арванхоёрдугаар сар гэхэд 330 сум, 171 хороо бүрэн холбогдож дуусна гэдгийг дуулгав.
УБЕГ-ын дарга Д.Дэлгэрсайхан, АХБ болон УБЕГ-ын нягт хамтын ажиллагааны үр дүнд 2018 онд эхлүүлсэн төсөл амжилттай хэрэгжиж байгаад баяртай байна гээд үүнд төслийн удирдагч болон багийн гишүүдийн манлайлал, шуурхай зөвлөмж, шийдвэр нэн чухал үүрэг гүйцэтгэснийг цохон тэмдэглэв.
Талууд улсын бүртгэлийн байгууллагын хүний нөөц болон сургалтын нэгдсэн систем, мөн нас баралтын системийг нэвтрүүлэх, цаашид анхаарах асуудал зэргээр санал солилцов.
Уулзалтад УБЕГ-ын Тамгын газрын дарга Г.Цолмон, МТГ-ын дарга П.Нэргүй, ХАСХ-ийн дарга Г.Хэрлэн, АХБ-ны Монгол дахь Суурин төлөөлөгчийн газрын төслийн шинжээч Э.Уянга, төслийн зохицуулагч Г.Пүрэвсүрэн, санхүү, захиргааны мэргэжилтэн Б.Болор-Эрдэнэ, худалдан авалтын мэргэжилтэн Д.Цэвээн-Үр, ХШҮ-ийн мэргэжилтэн М.Нандинчимэг нар оролцлоо.
