Монгол Улсын Засгийн газрын урилгаар Европын аюулгүй байдал, хамтын ажиллагааны байгууллагын Ардчилсан институт, хүний эрхийн албанаас Монгол Улсын Ерөнхийлөгчийн 2021 оны ээлжит сонгуулийг ажиглах тусгай хороог 05 дугаар сарын 25-ны өдрөөс байгуулан ажиллаж байна. Уг тусгай хорооны дэд тэргүүн Гиллес Сафи болон шинжээч Марсела Маскова нартай өнөөдөр /2021.06.02/ цахимаар уулзав.
Уулзалтад Улсын бүртгэлийн ерөнхий газрын дэд дарга Г.Билгүүн, ИУБГ-ын дарга Т.Нармандах нар оролцож Улсын бүртгэлийн байгууллага сонгуулийн үйл ажиллагаанд ямар үүрэгтэй оролцдог талаар мөн сонгуулийн ажлын явцын талаар тодорхой мэдээлэл өгч, шинжээчийн асуултад хариулт өглөө. УБЕГ-ын дэд дарга Г.Билгүүн Монгол Улсын Ерөнхийлөгчийн сонгуулийн бэлтгэл ажлын явцыг танилцуулж, төлөвлөгөөний дагуу хийж хэрэгжүүлэх ажлын гүйцэтгэл 90 гаруй хувьтай явагдаж байгааг яриандаа дурдлаа.
Европын аюулгүй байдал, хамтын ажиллагааны байгууллагын Ардчилсан институт, хүний эрхийн албаны Монгол Улсын Ерөнхийлөгчийн 2021 оны ээлжит сонгуулийг ажиглах тусгай хорооны зүгээс өнөөдрийн уулзалтыг зохион байгуулж, хамтран ажиллаж байгаад талархаж буйгаа илэрхийлээд хүлээсэн үүрэг амлалт, ардчилсан сонгуультай холбоотой олон улсын хэм хэмжээ, үндэсний хууль тогтоомжтой хэрхэн нийцэж буй эсэхийг ажиглан, үнэлэлт дүгнэлт болон зөвлөмж өгч, энэхүү ажиглалтын тайлангаа олон улсад нээлттэй танилцуулна гэдгээ уулзалтын үеэр онцлов.
Монгол Улс 2012 онд ЕАБХАБ-ын 57 дахь бүрэн эрхт гишүүнээр элссэн бөгөөд өмнө нь Монгол Улсын Ерөнхийлөгчийн 2013, 2017 оны сонгууль мөн Улсын их хурлын 2016, 2020 оны сонгуулийг тус тус ажиглаж, хамтран ажиллаж байсан юм.
