2022 оны 05 дугаар сарын 01-нээс Хувь хүний мэдээлэл хамгаалах тухай хууль болон Цахим гарын үсгийн тухай хуулийг дагаж мөрдөх бөгөөд Цахим гарын үсгийн тухай хуулийн шинэчилсэн найруулгыг 2021 оны 12 дугаар сарын 17-ны өдөр УИХ-ын нэгдсэн чуулганаар эцэслэн баталсан.
05 дугаар сарын 01-нээс Улсын бүртгэлийн байгууллагын аймаг, нийслэл, сум, дүүрэг, хорооны бүх нэгжүүдээр дамжуулан 16 нас хүрсэн иргэн бүрд тоон гарын үсэг олгох ажлыг эхлүүлэх бөгөөд үүнтэй холбоотойгоор шат дараатай олон ажлуудыг төлөвлөн хэрэгжилтийг ханган ажиллаж байна.
Монгол Улсын Засгийн газрын 2020-2024 оны үйл ажиллагааны хөтөлбөрийг хэрэгжүүлэх арга хэмжээний төлөвлөгөөнд тусгагдсан “Улсын бүртгэлийн цахим үйлчилгээг өргөжүүлнэ” гэх заалтыг хэрэгжүүлэх ажлын хүрээнд Ухаалаг засаг төслийн дэмжлэгтэйгээр Төрийн цахим үйлчилгээний нэгдсэн систем /www.e-mongolia.mn/-ээр дамжуулан Улсын бүртгэлийн ерөнхий газраас 22 төрлийн лавлагаа, 50 төрлийн үйлчилгээг үзүүлж байна. Мөн цахим машин буюу киоскоор дамжуулан иргэний биеийн давхцахгүй өгөгдлийн бүртгэлийн иргэний мэдээллийг таньж, лавлагаа олгох, бүртгэлийн үйлчилгээний хүсэлт хүлээн авах боломжтой болсноор иргэд бүртгэлийн нэгжид дугаарлах, материал бүрдүүлэх зэргээр заавал бүртгэлийн албан хаагчтай харьцан үйлчилгээ авах шаардлагагүй болгож, бүртгэлийн цахим үйлчилгээний машиныг хэрэглээнд нэвтрүүлсэн.
Өнөөдөр Нийслэл хотод 1.600.000 гаруй иргэн оршин сууж байгаа бөгөөд 9 дүүрэг, нийслэлийн үйлчилгээний нэгдсэн 6 төв, 172 хороогоор дамжуулан улсын бүртгэлийн үйлчилгээг үзүүлж байгаа нь нийт төрийн үйлчилгээний 70 гаруй хувийг эзэлж байна. Түүнчлэн төрийн үйлчилгээний төвлөрлийг сааруулахад улсын бүртгэлийн байгууллагын үүрэг оролцоо их бөгөөд бүртгэлийн үйлчилгээ цахимжсанаар төрийн бүтээмж нэмэгдэж иргэдэд ойртон, албан хаагчдын ажлын ачааллыг тэнцвэржүүлэх, төрийн үйлчилгээний чанарыг сайжруулахад эерэг нөлөө гарах зэрэг олон ажлын эхлэл болох юм.
Дээрх ажлын хүрээнд Нийслэлийн засаг дарга бөгөөд Улаанбаатар хотын захирагч Д.Сумъяабазар, Нийслэлийн цахим хөгжил, мэдээллийн технологийн газрын дарга О.Чинзориг болон нийслэлийн 9 дүүргийн засаг дарга, бусад албаны хүмүүс өнөөдөр /2022.04.05/ Улсын бүртгэлийн ерөнхий газарт ажиллалаа. Зочдыг УБЕГ-ын дарга Д.Дэлгэрсайхан, Г.Атармаа болон бусад газар, хэлтсийн дарга нар хүлээн авч Мэдээллийн технологийн төвд байрлах иргэний бичиг баримтын үйлдвэр, сервер, хяналтын өрөө, Улсын бүртгэлийн нэгдсэн лавлах 1800-1890-ийн үйл ажиллагаа, мөн Улсын бүртгэлийн цахим үйлчилгээний төв, архивын баримтын үзмэр, архивын байртай танилцуулав.
.jpg)
.jpg)
Мөн энэ үеэр УБЕГ-ын дарга Д.Дэлгэрсайхан “Улсын бүртгэлийн байгууллагын өнөөгийн нөхцөл байдал, цахим шилжилт” сэдвийн хүрээнд Улсын бүртгэлийн байгууллагын үйл ажиллагааны танилцуулга, чиг үүрэг, түүнчлэн цахим гарын үсгийн тухай хуулийн хэрэгжилтийг хангах ажлын хүрээнд Улсын бүртгэлийн байгууллага ямар чиг үүрэгтэй оролцож, ямар ажлыг хэрэгжүүлэх талаар хүрэлцэн ирсэн зочдод мэдээлэл хүргэхийн сацуу хүрэлцэн ирсэн зочдод талархалаа илэрхийлээд “81 жилийн түүхэн энэ хугацаанд хотын дарга, дүүргийн засаг дарга нартай хамт УБЕГ-т ирж байсан тохиолдол байгаагүй. Өнөөдрийн энэ уулзалтаар олон сайхан санаа, санаачлага гарч, гарц шийдэл яригдаж байна.... Улсын бүртгэлийн байгууллагын албан хаагчдын ажлын ачааллыг тэнцвэржүүлэх, улсын бүртгэлийн үйлчилгээг цахим /e-mongolia, ухаалаг машин/-аар үзүүлэх, зорилтот бүлэг буюу өндөр настан, хөгжлийн бэрхшээлтэй иргэдэд зориулсан очиж үйлчлэх зориулалт бүхий зөөврийн тоног төхөөөрөмж хэрэглэх, дундын мэдээллийн сан ашиглах, мэдээлэл солилцох зэрэг олон асуудлыг хөндөж ярьлаа.
Бидний хамтран хийж хэрэгжүүлэх ажил үр дүнд хүрч, эрх зүйн орчинд тодорхой өөрчлөлт гарна гэдэгт итгэж байна....Бид нийгэмдээ, иргэддээ тустай ажлуудыг харилцан хамтарч хийх, цахим шилжилтийн ажилд зорилгоо нэгтгэн, дөрөө харшуулан ажиллахдаа таатай байх болно” гэлээ.
Нийслэлийн засаг дарга бөгөөд Улаанбаатар хотын захирагч Д.Сумъяабазар “Хүлээн авч мэдээлэл хүргэж байгаад талархалаа илэрхийлээд ард иргэдээ эрүүл, аюулгүй, авилгагүй, хүнд сурталгүй нийгэмд амьдруулахад төрийн байгууллагуудын хоорондын уялдаа холбоо маш чухал. Ялангуяа Монгол Улсын Ерөнхий сайдын санаачилсан цахим бодлого, цахим хөгжил, хөгжүүлэлтийг хийх тал дээр Улаанбаатар хот манлайлан оролцохын тулд бид нэг зохион байгуулалттай ажиллаж, улсын бүртгэлийн байгууллагатайгаа илүү ойртон, нягт хамтарч, нарийвчилсан төлөвлөгөөний дагуу ажиллах нь үр дүнд хүргэнэ. Төрийн үйлчилгээг иргэдэд хурдан шуурхай хүргэх, хүнд суртлыг багасгах, авлигыг бууруулах үндсэн хүчин зүйл нь цахим шилжилт юм. Үүнтэй холбоотойгоор холбогдох ажлуудыг шуурхай хийх тал дээр Нийслэлийн цахим хөгжил, мэдээллийн технологийн газрын дарга О.Чинзоригийг онцгой анхаарч ажиллахыг үүрэг болгов. Мөн цахим хөгжлийн багц хуулийн хэрэгжилтийг хангах, иргэдэд төрийн үйлчилгээг тэр дундаа улсын бүртгэлийн үйлчилгээг шуурхай чирэгдэлгүй хүргэхэд бүхий л талаар хамтран ажиллахаа илэрхийлж бидний хамтын ажиллагаа хөгжил авчирна гэдэгт итгэлтэй байна” гэлээ.
Дүүргийн засаг дарга нар мөн улсын бүртгэлийн албан хаагчдын нийгмийн асуудалд онцгой анхаарлаа хандуулж, мөн дүүрэг бүрд ухаалаг машиныг байрлуулах тал дээр хамтран ажиллаж ойрын хугацаанд шийдвэрлэнэ гэв. Цахим засаглалын хүрээнд хүн ам ихээхэн төвлөрсөн дүүрэг, хороодод нэг цэгийн үйлчилгээ, ухаалаг системийг нэвтрүүлэх нь эдийн засгийн болоод цаашилбал их хотын автозамын түгжрэлийг бууруулахад тодорхой хэмжээний нөлөө үзүүлэх чухал ач холбогдолтой гэдэгт хоёр тал санал нэгдэж байгаа бөгөөд бусад олон асуудлаар харилцан санал солилцож, тодорхой асуудлуудыг шийдвэрлэлээ.
.jpg)
.jpg)
